أكلات سورية خفيفة

موضوع: أكلات سورية خفيفة 14/6/2010, 09:33

عزومة من المطبخ السوري

طبعاً الأكل المصري الأصيل اللي كلنا بنحبه زي الكشري والملوخية والمحشي وغيرها من الأكلات اللي بتعتبر تراث الأكل المصري ما حدش يقدر يستغنى عنه..

لكن أكيد كلنا من وقت للتاني بنبقى عايزين نجدد في أكلاتنا، وندوق حاجات جديدة ونجرّب نكهات مختلفة في الأكل...

علشان كده فكّرنا إننا ندخل كل مطابخ العالم، وننقي منها أكلات مختلفة تكون جديدة وفي نفس الوقت تكون سهلة وبسيطة..

والنهارده عزومتنا كلها هتكون أطباق من "المطبخ السوري" يا رب تعجبكم..

يلّا بينا نشوف هنعمل إيه...

*********************

أكلات سورية خفيفة Juice_0

التوت بيساعد على تحسين الحالة النفسية

عصير التوت
التوت من الفواكه اللي لها فوائد كتيرة جداً؛ لأنه بيساعد في تنشيط الدورة الدموية، وبيحمي من الإصابة بتصلّب الشرايين، كمان بيساعد على تحسين الحالة النفسية ومضاد للاكتئاب...

المقادير:
كوب توت
2 كوب سكر

الطريقة:
1- اغسلي التوت كويس، واضربيه في الخلاط لمدة 3 دقائق، وبعد كده صفّيه كويس.

2- حطي عصير التوت في وعاء من الفخار ومعاه السكر، وارفعيهم على النار وسيبيهم لغاية ما يغلوا، وخلي بالك إنك تشيلي الريم مِن على الوش، وبعد ما يغلي سيبيه على النار لمدة ربع ساعة مع التقليب بمعلقة خشب.

3- بعد كده صبّي العصير في وعاء وسيبيه يبرد شوية، وبعد كده غطّيه وحطيه في الثلاجة، وعند التقديم املي ثلث الكوب بالعصير، وزوّدي باقي الكوب بمية باردة.

************************

سلطة الفتوش السورية

سلطة الفتوش

المقادير:
1/2 رغيف محمص
3 حبات طماطم
3 حبات خيارات
3 حبات فجل
4 أعواد بصل أخضر "الجزء الأبيض"
بصلة
حبة فلفل أخصر
خس
حزمة بقدونس مفرومة
1/2 كوب عصير ليمون
2 فص ثوم مفرومين كويس
1/2 معلقة صغيرة نعناع ناشف مفروك
1/2 كوب زيت زيتون
1/2 معلقة صغيرة سماق مطحون (موجودة عند العطار)
1/2 معلقة صغيرة فلفل أحمر مطحون (موجود عند العطار)
ملح
1/2 رغيف للتزيين (حسب الرغبة)

الطريقة:
1- كسّري الرغيف المحمص لقطع صغيرة.

2- اغسلي الخضار كويس جداً، وقطّعيه كله لقطع صغيرة أوي وتكون كلها متساوية في الحجم.

3- أحضري وعاء كبيراً، وحطّي فيه الثوم والملح والزيت والخل والنعناع الناشف وعصير الليمون والسماق وحطيهم على جنب.

4- بعد كده اخلطي الخضار المقطّع في وعاء تاني، وضيفي عليه الخبز المحمّص وخليط الثوم والملح والزيت اللي حضّرتيه في الأول، وقلّبي كل المكوّنات مع بعضها، وممكن تزيّنيها بإضافة قطع الخبز المحمص على الوش.. وقدّميها وبالهنا والشفا.

***********************

شوربة العدس على الطريقة السورية

شوربة العدس على الطريقة السورية

المقادير:
كوب عدس أصفر مسلوق
كوب قمح مسلوق
جزرتين مقطعتين لقطع صغيرة
كرفس مفروم
ملح وقرفة وكمون
ثوم مفروم
عصير ليمون
نعناع أخضر مفروم
1/4 كوب زيت زيتون

الطريقة:
1- شوّحي البصل والثوم في زيت الزيتون لغاية ما تحسي إن لونهم بدأ يتغيّر.

2- بعد كده ضيفي العدس والكرفس والنعناع والجزر، وقلّبيهم مع بعض وضيفي عليهم الملح والقرفة، وحطي عليهم كمية من الماء، وسيبيهم على نار هادية لمدة 40 دقيقة أو لغاية ما تحسي إن كل المكوّنات اتسلقت كويس.

3- اضربي الخليط السابق في الخلاط كويس وصفّيه، وبعد كده خدي الخليط المصفّى وحطيه مرة تانية على النار، مع إضافة القمح المسلوق وسيبيهم على النار لمدة 5 دقائق، وبعد كده حطي عصير الليمون والكمون، واغرفي الشوربة في أطباق التقديم، وممكن تزيّني الأطباق بأوراق النعناع وقدّميها وهي سخنة.. وبالهنا والشفا.

************************

ممكن تزيني الطبق بالصنوبر

الفريكة

المقادير:
1/2 كيلو لحمة موزة مقطّعة قطع صغيرة أو فرخة كاملة مقطعة قطع صغيرة
2 كوب فريك (متنقي كويس)
بصلة متوسطة مفرومة
ملح وفلفل
1/4 معلقة صغيرة قرفة مطحونة
معلقة وربع سمنة
1/2 كوب صنوبر

الطريقة:
1- أحضري حلة كبيرة، وحطّي فيها معلقة كبيرة من السمنة، وشوّحي فيها البصلة، وبعد كده حطي اللحمة وحمّريها كويس مع البصلة.

2- بعد كده هتضيفي 1/2 كوب ماء على اللحمة أو الفراخ وتبليها بالملح والفلفل والقرفة، وسيبيها على نار هادية لمدة ساعة؛ علشان اللحمة تستوي كويس، وتابعيها في خلال الساعة دي علشان لو محتاجة إنك تزوّدي لها مية.

3- بعد ما اللحمة تستوي، طلّعي اللحمة من المرقة بتاعتها، وسيبيها على جنب علشان هنستخدم المرقة بعد كده.

4- أحضري المرقة، وحطّيها على النار، وظبّطي ملحها على حسب رغبتك وسيبيها لغاية ما تغلي.

5- في الوقت اللي تكوني بتغلي فيه المرقة على النار، أحضري الفريك وشوّحيه شوية في قليل من السمن، وبعد كده ضيفيه للمرقة المغلية، بس خلي بالك إن المرقة لازم تكون مغطية الفريك.

6- سيبيهم على نار متوسطة لغاية ما يبدأ الفريك في الغليان، وبعد كده قللي النار شوية، وسيبيه لغاية ما يستوي، وممكن تزوّدي مرقة لو الفريك محتاج.

7- حمّري الصنوبر في قليل من السمن، وبعد كده أحضري طبق التقديم وحطي فيه الفريك، وحطي على الوش قطع اللحمة، وممكن تزيني الطبق بالصنوبر.. وقدّميها وبالهنا والشفا.

*******************

من أشهر الأطباق الشعبية السورية

المامونية
المامونية بتعتبر من أشهر الأطباق الشعبية السورية، وهي بتعتبر من الحلويات، إلا أن السوريين في بعض الأوقات بياكلوها مع الجبنة على الفطار..

المقادير:
كوب من دقيق السميد (متوافر عند العطار وفي السوبر ماركت)
2 كوب سكر
5 أكواب لبن أو مية (على حسب الرغبة)
2 معلقة كبيرة زبدة
قرفة "للتزيين"
فستق مطحون أو أي مكسرات عندك "للتزيين"

الطريقة:
1- اخلطي اللبن مع السكر، وارفعيهم على النار لغاية ما يغلوا، وبعدين شيليهم من على النار.

2- أحضري طاسة، وحطّي فيها الزبدة ومعاها السميد، وحطيهم على النار، وقلّبي السميد في الزبدة لغاية ما السميد يتحمّر.

3- بعد ما السميد يتحمّر، ضيفيه على اللبن والسكر المغلي، وقلبيهم كويس، وسيبيهم على نار هادية لمدة ربع ساعة.

4- بعد كده شيليها من على النار، وصبيها في أطباق التقديم، وزيّني وشها بالفستق والقرفة، وممكن تقدميها مع القشطة.. وبالهنا والشفا.

موضوع: رد: أكلات سورية خفيفة 29/6/2010, 11:55

ما في ردود شكلو ما في حدا جوعان الكل شبعان
ههههه